Ko te pita, nema sanitarne, niti Stožera, pa bez maske moreš bit, niti distancu od maslin držat, niti ruke prati. To je raj za tilo i dušu jer uz sunce, čistu ariju i malo vitra moreš obrambeni ojačati da nas ta nesritna korona ne more više čapati, ka onih dvi i po iljade ča danas čapaje i ta beštija korona se još ne pridaje.
A dok si u polju među maslinama svojin najbolje je mobitel doma ostaviti i na cili stožer lipo zaboraviti, kada ih nima.
I na ono: "Masku skini, masku stavi svaki dan se po sto puta radi". Upiši se vamo, ispiši se tamo....Ma tribalo bi naše doture Capaka, Beru i Alenku u masline pozvati, pa nek se na licu mista uvire da se korona tu nemore čapati. A tek kad se profešuri i dokturi Đikić i Radman javi, poprave se stvari. Jedan kaže da nismo spremni, a drugi misli proći će sve samo od sebe!
A onda ne znaš ni sam više ča da misliš? Jer ako zatriba i dođe crvena lista more bit da će nan onda i dozvolu za masline kakvi lokalni stožer morati izdati.
A naša šjora Vinka sa slike nan govori da su masline lipe, i da nisu loše rodile, pa kada je sezona turizma završila ona se odman u masline ubacila.
Zadovoljna je!
A onda masline sada triba čim prije pobrat i u konobu dotirat, jer nikad se ne zna da se čakod ne štramba, vrime oli korona da jače ne stegne, pa i odlazak u masline još pod upitnik dođe? A ko zna i kako će Makine i traulici raditi. Sve je upitno, a kad se tek počnu presice sazivati i priopćenja pisati , onda više ni u polja bez maski nema? Aj ča, moj lipi čovik još nam samo to fali da nas zakači, nema šta, na sve smo se naučili, pa ništa nije ka i prije, slaže se s nama šjora, dok mi gremo dalje.
A Šjor sanja "Naprid Bili"
Jer kad nan se prisidnici Vlade i Države tako dugo i lipo prid cilin svitom "časte", nacija se zabavlja do mile volje. Ali moj Šjor ne voli više ni Dnevnik gledati , nekako mu je draže Koronu na mulu čekati. To mu je nekako lipše, zna da ga ona neće čapati , jer je ovo lito na moru lipu pitura nabaca pa ga D vitamin i crveno bili luk štiti od Korone i svih tiju pustih Covid i Janaf faca. Zato on već odavno Dnevnike i ne gleda. U duši mu samo Hajduk i "Naprid Bili" odzvanja dok prid očima Split i Poljud sanja.
Sve je to lipota iz mladih dana koja ga prati i u Koroni sada. Jedva čeka kad će opet moći na stadion poći i Hajduku svome doći.
Živi mi i zdravi bili i lipo Vas pozdravlja Vaš Paško!
foto: Paško (privat)