Na tren se prigne, sagne, proviri, zaviri i bocu iz turističkog beznačaja i zaborava u svoju karocu sa gušton primi. I sve bi to lipo bilo da je Perin barometar ovo lito dosega prošlolitnji nivo. Ali nažalost nije, nego se kala, šta meštra od boc čini pomalo i nesritnin, jer svako voli ka mu posal krešije i naprid gre. Ali nažalost ovo lito tako sa bocan nije, jer manje ih je.
Govori mi da je šesti misec bija gori nego lani, a za sedmi tek bilancu pravi. Sad za koji dan će opet rezultate zbrajat , pa se boji da ga manjak ne uvati. Vidin do njega nije, jer njegova karoca uvik iston brzinom i žarom gre,tuta forca, ali boc je manje.
Misni kroničar doli na pijaci povida mi da su četri moguće opcije za to.
Ili je manje ljudi, ili manje piju, ili više sami boce vraćaju, oli je još više skupljači boc. Peta opcija je da nose boce iz Eu di je piva u pola jeftinija.. S njima Pero nima di, jer ih nima kome vratiti. A mislija je bidan ova žega i koliko će se toga popit, a kad ono boce falše ne more vratiti. Tako se je bidan ovo lito cili ka miš ispotija, ali uzalud posa se nije popravija.
Bilo kako bilo, za ovu struku i posa nije bolje, nego lošije, šta opet nije dobro. Ali bez obzira na sve, vidin uporni i vridni Pere opet se po plaži kroz hlad i borovinu vere, punon snagon naprid, tuta forca provlači. I požrtvovno rivlje da Karoca naprid gre, da ne ferma, oli negdi ne zapne.
Tako je i u tom poslu to, ako nisi bržji i prvi na licu mista drugi je čapa, pa si tako onda bez boce osta. A karoca i život gre, s manje boc lakše se rivlje, ali život tako nije. On iz dana u dan skuplji gre i sve krešije. Zna to naš meštar i zato još dok je špica sezone brzo kroz plaže i mule sa svojon karocom gre. Neka mu je sa srićon da čim bolje uspije, a vama šesni moj svite lip pozdrav od PAŠKE sa vodiške rive.