Nima dana da ne čujen ono, znaš ti našeg svita. Naša posla, mi smo ti vaki, mi smo ti naki. Neš ti naših ljudi. A joj sramote, to nima nigdi u svitu šta u nas, itd....
A za onu pozitivu koje ima, jer nije baš sve da nije kako triba, ka da malo ko mari. Već san na to navika, pa onda i ja kad vidin nešto lipo ne želin zamučat. Volin zapantit i napisat. Pa ću i s Vama sad dvi, tri, zgode ovih dan sa Srime proćakulat.
Kupan se tako ovih dan doli u portu kod konobe "DANIELA" na Lovetovu i vidin neki furešti điraju vamo tamo. I kad su došli onde doli kod one najliplje kuće sa bazenom, sa koje puca krasan pogled na more i čija se smokva krcata sa slatkin i privlačnim plodovima iz dvora naginje na cestu, vidin uvatili se ljudi smokve, kada in je čačina i kada ništa nisu deset dan ili.
A gori u dvoru sidi gazda i gleda ih. Mislin se, bit će sad belaja. Vidin čovik se diga, nešto bruntulja i doli prema njima gre. Kad je doša bliže otvara in kapiju i sa osmihon na licu govori:
"Ma slobodno izvolte, dođite bliže, uberite koliko van paše i onako će sve propasti i na pod pasti".
Vidin gosti su ostali pomalo zetečeni finon gestom dobrog i ljubaznog domaćina, pa onako malo ka sramno govore: "Ma fala, ne triba, ubrali smo onako samo par komadi iz gušta".
E, sad moreš koliko očeš
A onda doli u portu i sam sam jednu grešku učinija. Virujte mi nisan promislija. Svoj mali gumenjak od 3 metra i kvarat za jednu praznu bovu san priveza, dok san se malo od ove žege raženta. Nisan se još ni uspija točat, kad prema meni tuta forca leti jedan nabrijani gazda i lekciju mi iz trka čita: "Znate li vi da ste na moju bovu stali".
Govorin mu onako pomljivo ka u straju : Oprostite, vidija san da je prazna, bilo mi je vruće, malo san ferma. Nisan zna da je vaša, neću tu dugo ostat , tija san se samo malo okupat".
Vidin čovik je malo ka omeća, pa mi kaže onako od srca: "E, sad kad si tako iskreno reka, moreš koliko očeš tu ostat i brod za moju bovu vezat. I onako je prazna gosti su mi ošli ča".
Ljubazno i zahvalno mu odgovaran: Hvala lipa na ljubaznosti i ponudi. Vidin jugo će, i ne bi tija stati uz kraj, rađe ću se doli kod KLAUDIJA oli LUKE malo kalat, i koji dan na njiovu bovu privezat.
I nakon svega šta kazat, osim lipi i dobri naš svit, zna i te kako sa dobroton goste iznenadit.
Sa Lovetova lipi pozdrav od PAŠKE.
Gosti jos uzivaju u litu i smokvama na Lovetovu