U ovo bablje lito gušt je s brodom niz more poći, a kad se čovik mora i kupanja štufa onda je lipo i u neku valu malo počinit doći. Tako smo i mi malo u tihoj luci Prvić Luke neki dan fermali sa željon da bi doli na jednu malu rivu naš gumenjak privezali. I kad smo se rive čapali i barbete kalali, trči prema nami jedna furešta, vidimo Nijemica iz apartmana na mulu, i na njemačkom viče da se ne smimo tu iskrcati ni vezati, jer to isprid je sve njezina teraca koju ona plaća. Nismo se tili bunit, a niti s njon kontreštavat i objasnit je novi saborski zakon, iako dolazi iz vodeće članice EU, kako niko nima pravo polagat na more i rivu ka je javno pomorsko dobro. Jednostavno makli smo se ča, i na drugu bandu iste rive ošli vezat. Jedan mladi čovik iz druge kuće sa balkona nam govori, kako je taj dija rive frei i da se tu moremo vezat. Nima šta, čovik je odlično novi zakon skuža!
Mislimo se, šta bi bilo kad bi tako napravija svak ki ima kuću kraj mora i proglasija svoj privatni turistički pojas, te se zabranija drugome na "svoju" rivu kupat, vezat i iskrcat.
Kaže mi doli u luci jedan domaći Šjor da san njemaškoj gošći mora reći, kako joj more i riva nisu čačini, ka ni od one domaće Šjore ča joj je apartman iznajmila i krivo je podučila. A ako in štogod nije jasno mogu i njih u Sabor zvat, pa će in oni lipo objasnit cilu stvar. Još mi jedan domaći čovik šjor Ive, doli u portu kaže, da san se komotno moga vezat, pa ako triba i koga od odgovornih pozvat. Ali čujen kako su i drugi s time već štorije imali, odgovorne zvali pa se ništa prominilo nije.
Mislin se nima smisla cilu stvar komplicirat. A onda san se ipak sitija da bi bilo najbolje u Šepurinu MAJU SEVER zvat, pa neka ona s njima razjasni cilu stvar. Čigova je riva, i ki se tu more, vezat i kupat?
Sigurno prisidnica svih novinari Europe to najbolje zna, čija je riva i šta je Sabor izglasa.
Nažalost u Šepurini mi kažu, kako njiove Maje trenutno u selu nima. Valjda je ošla na koji kongres svitski? Mislin se tako, kako mi ne bi bilo loše cilu stvar Ruzariju kazat , legendarnom misnom zvonaru ki je Majin susjed, pa neka joj onda on prinese cilu stvar. Rozarijo to dobro zna, šta čoviku znači more i riva, i još kad ti se neko, ka nama ova Šjora u Luci, ne da za rivu zavezat. Mislin se, kako bi se tek on cili zapinija, da je to vidija? Znan, ne bi moga izdurat!
Engleze zanima Trapula
"Trapula" za Engleze
A u Zlarinu druga stvar. Tamo nimamo problema za vezat, ka ni jedrenjaci puni Englezo šta u mistu guštaju i cilin selon neumorno điraju. Ma sve ih živo zanima. Slikaju i snimaju, domaći svit ispituju. Trevija san ih doli kraj rive u caffe bar "Trapuli", pa me pitaju čak i to, šta to znači trapula? Da li je to kakvo jelo, oli piće? Kad san in reka da je to ona stvar ča udre miše po kostin i glavam, nasmijali su se do suza. I ne svativši da je njih trapula čapala svojin ugodnim ambijentom i svojon gastro ponudom, pa su u njoj fermali i svega se natakali.
Vidivši još u Zlarinu dosta malih autića za golf, Englezi pitaju domaći svit di je tu golf plac? Kažu in da ga Zlarin, nažalost nima. Ko bi toliko vode i trave da. A onda ih zanima zašto se koriste ta mala auta. Kažu in, za po selu se vozit i parangale i mriže do broda dovest. Jer mištane žive za na ribe poć. Kuš lipše. Zlarin je cili takav , oaza mira i lipote, misto i otok baš za guštat.
Lip pozdrav sa Prvića i Zlarina od PAŠKE!
Golf auto za potribu i selon điravat